शिरूर तालुक्यात जिल्हा परिषद व पंचायत समिती निवडणुकीत 75.59% मतदान; सोमवारी मतमोजणी

 शिरूर तालुक्यात जिल्हा परिषद व पंचायत समिती निवडणुकीत 75.59% मतदान; सोमवारी मतमोजणी!

शिरूर -सुदर्शन दरेकर

शिरूर तालुक्यात पार पडलेल्या जिल्हा परिषद आणि पंचायत समिती निवडणुकीत मतदारांनी उत्स्फूर्त प्रतिसाद देत सरासरी 75.59 टक्के मतदान नोंदवले आहे. सकाळी 7.30 ते सायंकाळी 5.30 या वेळेत शांततेत आणि शिस्तबद्ध वातावरणात मतदान प्रक्रिया पार पडली. तालुक्यातील विविध मतदारसंघांमध्ये मतदारांनी मोठ्या संख्येने हजेरी लावल्याने लोकशाही प्रक्रियेवरील विश्वास पुन्हा अधोरेखित झाला.

उपलब्ध अधिकृत आकडेवारीनुसार, एकूण 2,28,113 मतदारांनी मतदानाचा हक्क बजावला, यामध्ये 1,18,685 पुरुष, 1,09,422 महिला, तर 6 इतर मतदारांचा समावेश आहे. अनेक मतदान केंद्रांवर सकाळपासूनच रांगा दिसून आल्या. ग्रामीण भागात महिलांचा सहभाग विशेष उल्लेखनीय ठरला.

मतदान टक्केवारीत काही विभागांनी आघाडी घेतली. रांजणगाव गणपती व परिसरातील मतदान केंद्रांवर 80 टक्क्यांपेक्षा अधिक मतदान नोंदवले गेले, तर काही भागांत 70 ते 76 टक्क्यांच्या दरम्यान मतदान झाले. एकूणच तालुक्यातील मतदारांनी विकास, स्थानिक प्रश्न आणि नेतृत्व या मुद्द्यांवर मतदान केल्याचे चित्र दिसून आले.

दरम्यान, विविध माध्यमांनी प्रसिद्ध केलेल्या एक्झिट पोलनुसार या निवडणुकीत अजित पवार यांच्या राष्ट्रवादी काँग्रेस गटाला मोठे यश मिळण्याची शक्यता वर्तवण्यात येत आहे. मात्र, अंतिम चित्र सोमवारी होणाऱ्या मतमोजणीनंतर स्पष्ट होणार आहे. त्यामुळे उमेदवारांसह कार्यकर्ते आणि मतदारांमध्ये उत्सुकता शिगेला पोहोचली आहे.

निवडणूक प्रशासनाने मतदान प्रक्रिया सुरळीत पार पाडण्यासाठी चोख नियोजन केले होते. कायदा व सुव्यवस्थेचा प्रश्न निर्माण होऊ नये म्हणून पोलिस बंदोबस्त तैनात करण्यात आला होता. संपूर्ण प्रक्रिया शांततेत पार पडल्याने प्रशासनाने समाधान व्यक्त केले आहे.

आता सर्वांचे लक्ष सोमवारी होणाऱ्या मतमोजणीकडे लागले असून, तालुक्यातील सत्तासमीकरणावर या निकालांचा मोठा परिणाम होण्याची शक्यता व्यक्त केली जात आहे.