५२व्या तालुकास्तरीय विज्ञान, गणित व पर्यावरण प्रदर्शनाचे शिरुरच्या चांदमल ताराचंद बोरा महाविद्यालयात उद्घाटन
शिरूर :सुदर्शन दरेकर
पुणे जिल्हा परिषद, शिक्षण विभाग (प्राथमिक व माध्यमिक), पुणे, पंचायत समिती (शिक्षण विभाग) शिरुर, व शिरुर शिक्षण प्रसारक मंडळाचे, चांदमल ताराचंद बोरा महाविद्यालय शिरुर यांच्या संयुक्त विद्यमाने 'शिरूर तालुकास्तरीय विज्ञान, गणित व पर्यावरण प्रदर्शन' शुक्रवार दि. २७ डिसेंबर व शनिवार दि.२८ डिसेंबर रोजी चांदमल ताराचंद बोरा महाविद्यालयात आयोजित करण्यात आले. या प्रदर्शनाचा विषय 'समाजासाठी विज्ञान व तंत्रज्ञान' असा होता. या दोन दिवशीय विज्ञान प्रदर्शनाच्या उद्घाटनासाठी मा. डॉ. पंडित विद्यासागर, मा. कुलगुरु, स्वामी रामानंद तीर्थ विद्यापीठ नांदेड, तर कार्यक्रमाचे अध्यक्ष म्हणून मा.धरमचंदजी फुलफगर, सदस्य महाविद्यालय नियामक मंडळ उपस्थित होते. तसेच मा.श्री महेश डोके, गट विकास अधिकारी पंचायत समिती, शिरूर, मा. बाळकृष्ण कळमकर, गटशिक्षणाधिकारी इत्यादी मान्यवर उपस्थित होते.
कार्यक्रमाच्या सुरुवातीला देशाचे माजी पंतप्रधान डॉ.मनमोहन सिंग यांना श्रद्धांजली अर्पण करण्यात आली. त्यानंतर विद्याधाम प्रशालेचे विद्यार्थ्यांनी स्वागत गीत सादर करुन कार्यक्रमाला सुरुवात झाली. महाविद्यालयाचे मा.प्राचार्य डॉ.के.सी.मोहिते यांनी प्रास्ताविक केले. त्यांनी आपल्या प्रास्ताविकात महाविद्यालयात वर्षभर राबविण्यात येणाऱ्या विविध उपक्रमांचा आढावा घेतला. यामध्ये प्रामुख्याने अविष्कार सारख्या स्पर्धेतून भविष्यातील वैज्ञानिक कसे घडू शकतात हे त्यांनी सांगितले. तसेच देशपातळीवर विज्ञान व तंत्रज्ञानात कसे बदल होत चाललेत हेही नमूद केले. शिक्षक, पालक यांनी विद्यार्थ्यांचे प्रोजेक्ट्स पाहून कौतूक करावे अशी अपेक्षा व्यक्त करुन विज्ञान प्रदर्शन आयोजन करण्यापाठीमागची भूमिका मांडली.
मा. पंडित विद्यासागर यांनी आपल्या उद्घाटनपर भाषणात विज्ञान पद्धती समजावून सांगितली. विद्यार्थ्यांनी प्रथम निरीक्षण करायला शिकले पाहिजे व प्रयोग करून त्यातून निष्कर्ष काढले पाहिजेत असेही त्यांनी सांगितले. भारताचे पहिले पंतप्रधान पंडित नेहरू यांनी सुद्धा विज्ञान आणि तंत्रज्ञानाच्याशिवाय विकास होणार नाही अशी भूमिका मांडली होती हेही त्यांनी सांगितले. त्यांनी आपल्या भाषणात रामानुजन, सर सी. व्ही. रामन, जगदीश चंद्र बोस इत्यादी वैज्ञानिकांचे भारताच्या वैज्ञानिक जडणघडणीमध्ये असलेले योगदान स्पष्ट केले. त्याचबरोबर अशा प्रकारची विज्ञान प्रदर्शने आयोजित करून विद्यार्थ्यांवर वैज्ञानिक संस्कार होत आहेत असे सांगून हा उपक्रम स्तुत्य असल्याचे त्यांनी सांगितले व सर्वांना शुभेच्छा दिल्या.
तसेच श्री. तुकाराम बेनके, मुख्याध्यापक संघाच्या वतीने तर पंचायत समितीच्या श्री. बाळकृष्ण कळमकर, गटशिक्षणाधिकारी, श्री.महेश डोके, गटविकास अधिकारी यांनीही आपले मनोगत व्यक्त केले. या विज्ञान, गणित व पर्यावरण प्रदर्शन समितीचे समन्वयक डॉ. डी.एच. बोबडे यांनी कार्यक्रमाची रूपरेषा विषद केली. शेवटी कार्यक्रमाचे अध्यक्ष मा. धरमचंद फुलफगर यांनी त्यांच्या भाषणात विद्यार्थ्यांनी इतरांशी स्पर्धा न करता स्वतःशी स्पर्धा करावी असे त्यांनी सांगितले तसेच महाविद्यालयाने उपलब्ध करून दिलेल्या ग्रंथालय, प्रयोगशाळा, मैदान इत्यादी सेवांचा विद्यार्थ्यांनी उपयोग करून घ्यावा अशी अपेक्षा व्यक्त केली. सर्व स्पर्धक विद्यार्थ्यांना शुभेच्छा देऊन त्यांनी संयोजन समितीचे कौतुक केले.
या प्रदर्शनाचे आयोजन करण्यासाठी नियामक मंडळाचे अध्यक्ष मा. प्रकाशजी धारिवाल, संस्थेचे अध्यक्ष मा. अनिलजी बोरा, सचिव मा. नंदकुमार निकम, महाविद्यालयाचे प्राचार्य डॉ. के.सी.मोहीते यांचे मार्गदर्शन लाभले तर हे प्रदर्शन यशस्वीपणे पार पाडण्यासाठी उपप्राचार्य प्रा. एच.एस.जाधव, विज्ञान शाखा प्रमुख डॉ.एन.एम.घनगावकर, समन्वयक डॉ.डी.एच.बोबडे, प्रा.ए.एस.वनवे, श्री तुकाराम बेनके, श्री मारुती कदम, श्री संभाजी ठुबे तसेच महाविद्यालयातील सर्व शिक्षक, प्राध्यापक व कर्मचारी यांनी विशेष परिश्रम घेतले.
या उद्घाटन समारंभाचे सूत्रसंचालन डॉ.क्रांती पैठणकर यांनी केले तर आभार श्री. संभाजी ठुबे यांनी मानले.